Տիգրան Բ Արտաշեսյան, առավել հայտնի որպես Տիգրան Մեծ: Կառավարել է մ․թ․ա․ 95 թվականից մինչև մահ՝ մ․թ․ա․ 55 թվականը։
Տիգրանը Մեծ Հայքի Արտաշեսյանների թագավորությունից էր՝ Արտաշես 1-ինի թոռը։
Տիգրան Մեծի օրոք Մեծ Հայքի թագավորությունը հասնում է իր հզորության գագաթնակետին։ Պարտության մատնելով Պարթևական թագավորությանը և ստանալով Սելևկյան գահը՝ Հայքը կարճ ժամանակով դառնում է Առաջավոր Ասիայի հզորագույն պետությունը. Տիգրան Մեծի տերությունը տարածվում էր Կասպից ծովից մինչև Միջերկրական ծով, Կովկասյան լեռներից մինչև Միջագետքի անապատները։ Տիգրանը հիմնվելով Արտաշես բարենորոգումների վրա, կարողանում է իրագործել իր աշխարհակալական նկրտումները և ստեղծել «ծովից ծով Հայաստան»-ը։
Տիգրան Մեծի իշխանության տարիներին ընդլայնվում է հայկական դրամների շրջանառության ոլորտը։ Տարածված էին առավելապես նրա արծաթյա դրախմանոցները (մեկդրամյան) և տետրադրախմանոցները (չորեքդրամյան)։ Տիգրանյան դրամները մեզ են հասել հունարեն խորագրերով և մակագրություններով։
Տիգրան Մեծի արծաթյա դրամները իրենց վրա կրում էին առավելապես արքայից արքա մակագրությունը։ Այդպիսիները պահպանվել են մ.թ.ա. 77-73 թվականներից։
Կարծիքներ
Դեռևս կարծիքներ չկան: