ՀԱՂԹԱՆԱԿ ԶԲՈՍԱՅԳԻ

Հաղթանակի այգու կառուցման աշխատանքները սկսվել են 1930-ականների վերջին, իսկ զբոսայգու հուշահամալիրը բացվել է 1950 թվականի նոյեմբերի 29-ին։ Հայրենական մեծ պատերազմից հետո այն վերանվանվել է «Հաղթանակ» այգու, որի ամայի տարածքներում տարիների ընթացքում ծառեր են տնկվել։

1950 թ․ նոյեմբերի 29ին,  այգում բացվել է նաև  Ստալինի արձանը, որը հետագայում փոխարինվել է Մայր Հայաստան հուշակոթողով։ 1970 թվականին այստեղ բացվել է Հայրենական Մեծ պատերազմին Հայաստանի մասնակցությանը նվիրված թանգարանը, որը 1995 թվականին վերանվանվել է «Մայր Հայաստան» զինվորական թանգարան անվամբ։

1955-1958 թվականներին այգում տեղադրվում են կարուսելներ, սկսվում է  արհեստական լճի կառուցումը, որը կրկնում է Սևանա լճի ձևը։ Ամենախորը հատվածում լճի խորությունը կազմում է 8,5 մետր, այն  նախատեսված է եղել լողալու համար, սակայն ջուրն օգտագործվել է նաև ոռոգման համար։ Այժմ լճում հնարավոր է նավակ վարել։

1988-1989 թվականներին նորացվել է «Պտտվող անիվ» կարուսելը։

2011 թվականին բարերար Ռուբեն Վարդանյանի կողմից սկսվել է «Հաղթանակ» զբոսայգու վերակառուցման ծրագիրը։

Այգու մուտքի կառույցը սիմետրիկ է, ամեն հարթաքանդակը յուրահատուկ է և չի կրկնվում։ Ձախ կողմում քանդակված է առյուծ, աջ կողմում՝ վիշապ, կենտրոնում՝ արևի մեջ թուր։ Ետևի կողմից հարթաքանդակները նույնպես չեն կրկնվում։ Աջ և ձախ կողմերում կան արծվանման առասպելական թռչուններ։