ԱԼ.ՍՊԵՆԴԻԱՐՅԱՆԻ անվ. ՕՊԵՐԱՅԻ և ԲԱԼԵՏԻ ԹԱՏՐՈՆ

Ալեքսանդր Սպենդիարյանի անվան օպերայի և բալետի ազգային ակադեմիական թատրոնը գտնվում է Հայաստանի մայրաքաղաք Երևանի սրտում: 1926 թ. հունվարին որոշվում է Երևանում կառուցել Ժող.տուն` թատերական դահլիճով: Նախագծի կատարումը և շինարարության ղեկավարությունը հանձնարարվում է Ալեքսանդր Թամանյանին։ Սկսելով նախագիծը, Թամանյանը ձգտել է իրականացնել բոլոր նորագույն պահանջները՝ թատրոն 1200 հանդիսատեսի համար, համերգային սրահ, լսարաններ, գրադարան ընթերացարանով, ցուցասրահներ, խմբային պարապմունքների սենյակներ, բուֆետ։
Ժող.տան կառուցման տեղը որոշված էր Երևանի գլխավոր հատակագծով։ Շենքը շրջանաձև է, բաղկացած է 2 սրահներից՝ Արամ Խաչատրյան համերգասրահ՝ շուրջ 1400 տեղ և Ալեքսանդր Սպենդիարյանի օպերայի և բալետի ազգային թատրոն՝ 1200 տեղ, որը հետագայում ընդարձակվել և հասել է 1260-ի: Օպերայի և բալետի թատրոնը պաշտոնապես բացվել է 1933 թ. հունվարի 20-ին և առաջին բեմադրւթյունն էլ եղել է «Ալմաստ» օպերան: 1935թ. թատրոնը կոչվեց օպերայի եւ բալետի, 1939թ.՝ Ալ. Սպենդիարյանի անվան օպերայի եւ բալետի պետական թատրոն, 1956թ.՝ Ակադեմիական, իսկ 1994թ.՝ Ազգային Ակադեմիական: