ՍՈՒՐԲ ԳՐԻԳՈՐ ԼՈՒՍԱՎՈՐԻՉ ՄԱՅՐ ՏԱՃԱՐ

Սուրբ Գրիգոր Լուսավորիչ մայր տաճարը համարվում է  Երևանի գլխավոր եկեղեցին։

Այն կառուցվել է 1996–2001 թվականներին, ճարտարապետն է Ստեփան Քյուրքչյանը։ Կառուցումը մտահղացել է Ամենայն հայոց կաթողիկոս Վազգեն Ա Պալճյանը։ 1989 թվականի հուլիսի 14-ին  Գերագույն Հոգևոր խորհրդի նիստում որոշվել է՝ «… մայրաքաղաք Երևանում կառուցել մի մեծաշուք եկեղեցի հայկական դասական ճարտարապետական ոճի հիման վրա, որտեղ շուրջ երկու հազար հինգ հարյուր հավատացյալներ կարողանան միատեղ աղոթել»։ 1990 թվականին Երևանի քաղաքապետարանը Մայր եկեղեցու կառուցման համար Օղակաձև զբոսայգում, Երվանդ Քոչար փողոցի հարևանությամբ հատկացրել է 1,5 հա տարածք։

1990 թվականի մարտի 31-ին Վազգեն Ա կաթողիկոսի օրհնությամբ հուշաքար է դրվել Մայր եկեղեցու կառուցման տեղում՝ Օղակաձև զբոսայգու հարևանությամբ։

1996 թվականի փետրվարի 29-ին սկսվել են շինարարության նախնական աշխատանքներ, իսկ արդեն 2001 թվականի սեպտեմբերի 23-ին  Ամենայն հայոց կաթողիկոս Գարեգին Բ Ներսիսյանը օծել է եկեղեցին և մատուցել առաջին պատարագը։

Սուրբ Գրիգոր Լուսավորիչ մայր եկեղեցին Անիի տուֆով երեսապատված տարբեր կառույցների համալիր է՝ բաղկացած եկեղեցուց, Սուրբ Տրդատ և Սուրբ Աշխեն մատուռներից, զանգակատնից։

Եկեղեցու գավթում են պահվում 2000 թ. Նեապոլի Սբ. Գրիգոր Հայի եկեղեցուց Գարեգին Բ Ներսիսյան Ամենայն հայոց կաթողիկոսի բերած Գրիգոր Ա Լուսավորչի մասունքները։